മലപ്പുറം ‣ നിയമ വിദ്യാർത്ഥിയും യൂട്യൂബറുമായ അബു അരീക്കോടിന്റെ (വി. അബൂബക്കർ) മരണം ചുറ്റിപ്പറ്റി പുതിയ വെളിപ്പെടുത്തലുകൾക്ക് പിന്നാലെ പോലീസ് അന്വേഷണം ആരംഭിച്ചു. ലോൺ ആപ്പ് തട്ടിപ്പിന് ഇരയായതാകാമെന്ന ആരോപണമാണ് അന്വേഷണത്തിന് വഴിവച്ചത്. കോടഞ്ചേരി പോലീസ് അസ്വാഭാവിക മരണത്തിന് കേസ് രജിസ്റ്റർ ചെയ്തിട്ടുണ്ട്.
ഇടത് സൈബർ ഇടങ്ങളിൽ സജീവ സാന്നിധ്യമായിരുന്ന അബുവിനെ ഇന്നലെ വാടകവീട്ടിൽ മരിച്ച നിലയിലാണ് കണ്ടെത്തിയത്. മരണത്തിന് പിന്നാലെ, ഓൺലൈൻ ലോൺ ആപ്പുകളുടെ ചൂഷണത്തിലൂടെ മാനസികമായി തളർന്നതാകാമെന്ന സംശയമാണ് സോഷ്യൽ മീഡിയയിലും സുഹൃത്തുക്കളുടെ പോസ്റ്റുകളിലൂടെയും ഉയർന്നത്.
കോഴിക്കോട് മർക്കസ് ലോ കോളേജിലെ മൂന്നാം വർഷ നിയമ വിദ്യാർത്ഥിയായിരുന്നു അബു. സോഷ്യൽ മീഡിയയിലൂടെ സാമൂഹിക-രാഷ്ട്രീയ വിഷയങ്ങളിൽ വ്യക്തമായ നിലപാടുകളുമായി മുന്നോട്ട് വന്നിരുന്ന അദ്ദേഹത്തിന് വലിയ പിന്തുണയുണ്ടായിരുന്നു. പൊതുയോഗങ്ങളിലും ശക്തമായ പ്രസംഗങ്ങളിലൂടെ യുവജനങ്ങൾക്കിടയിൽ സ്വാധീനം ചെലുത്തിയിരുന്ന അദ്ദേഹം, പുതിയ കാലത്തെ വിദ്യാർത്ഥി ശബ്ദമായിരുന്നു.
إرسال تعليق